Gítarleikari McCartney á landinu

Hann hefur spilað fyrir fimmhundruð þúsund manns í Róm og hann tróð upp á opnunarathöfn Ólympíuleikanna í sumar. Nú gefst Íslendingum kostur á að hlusta á gítarleikarann Rusty Anderson.

Nafnið Rusty Anderson hringir kannski ekki bjöllum hjá mjög mörgum en engu að síður hefur hann spilað fyrir milljónir manna um allan heim en í rúman áratug hefur hann verið aðalgítarleikari Paul McCartney, bítilsins fræga. Þá hefur hann líka spilað inn á plötur Elton Johns.

„Á fyrstu stóru tónleikunum okkar held ég að hafi verið 500 þúsund manns, í Róm, fyrir framan Colosseum. Það var sannarlega gaman. Þegar maður horfði út í fjarskann sá maður mannhafið. Fólkið hélt kveikjurum á lofti og þetta var eins og hafsjór eldflugna. Þetta náði út í endalausan fjarskann," segir hann. „ Og Ólympíuleikarnir? Já, við skulum ekki gleyma Ólympíuleikunum. Það var mikið sjónarspil, flugeldar, fallhlífastökkvarar og urmull leikara. Það var toppurinn."

En Rusty lætur sér ekki nægja að spila með McCartney heldur hefur hann gefið út þrjár plötur með frumsömdu efni. Síðustu misserin hefur hann spilað með íslenska trommaranum Karli Pétri Smith sem búið hefur í Los Angeles til fjölda ára. Karl Pétur er nú fluttur heim og það er ástæðan fyrir heimsókn Rustys hingað til lands. Hann hóaði einnig í Andreu Gylfadóttur og drengina í Sniglabandinu og hópurinn hefur síðustu daga æft af krafti fyrir þrenna tónleika. Þeir fyrstu voru Austurbæ á fimmtudaginn var og í kvöld treður hann upp á Græna hattinum á Akureyri. Ferðinni líkur svo á kaffi Rósenberg 22. október.

En getur Rusty ekki dregið Sir Paul hingað til lands?

„Ég skal leggja inn gott orð og sjá hvað gerist," segir hann.