Fórnarlambið leitaði ásjár Annþórs og Barkar

Mikil örvænting virðist hafa gripið fórnarlamb Andreu Kristínar Unnarsdóttur í deilu þeirra, sem endaði með blóðugu uppgjöri þeirra á milli en Andrea var dæmd í fjögurra og hálfs árs fangelsi fyrir að misþyrma henni hrottalega ásamt tveimur öðrum mönnum.

Þannig kemur fram í dómi Héraðsdóms Reykjaness um málið að fórnarlambið hafi leitað aðstoðar hjá þeim Berki Birgissyni og Annþóri Kristjáni Karlssyni örfáum dögum fyrir árásina í desember, en báðir sitja þeir í gæsluvarðhaldi grunaðir um víðtæka brotastarfsemi auk þess sem þeir eru grunaðir um að hafa orðið samfanga sínum að bana. Á þeim tíma sem fórnarlambið leitaði til þeirra virðast þeir hafa verið umsvifamiklir í undirheimum Íslands, allavega ef mið er tekið af ákærum gegn þeim tveimur.

Fórnarlambið leitaði fyrst til Barkar fyrir árásina og bað hann um að aðstoða sig í deilum sínum við Andreu. Það er að segja að leiða þær saman svo þær gætu samið frið . Börkur samþykkti það en ekkert varð úr því. Aðkoma hans að málinu virðist ekki hafa verið meiri en það samkvæmt dómsorði.

Annþór vitnaði meðal annars í dómsmálinu en þar kemur fram að fórnarlambið hafi leitað til hans daginn fyrir árásina. Fórnarlambið spurði þá Annþór hvort hann ætlaði að skipta sér af stríði hennar við Andreu en Annþór sagði fyrir dómi að hann væri vinur þeirra beggja. Annþór svaraði beiðni fórnarlambsins á þá leið að honum kæmi málið ekkert við og því ætlaði hann ekki að skipta sér af því.

Þá sagði Annþór að fórnarlambið hafi aftur rætt við sig í janúar eða febrúar á þessu ári. Þá stóð fórnarlambið í þeirri trú að það hefði verið Börkur sem hefði beitt hana kynferðislegu ofbeldi í árásinni, sem reyndist alrangt, en það var Elías Valdimar Jónsson sem braut með þeim hætti á henni. Hann var aftur á móti með grímu þegar árásin átti sér stað og þess vegna vissi fórnarlambið ekki um hvern var að ræða.

Sjálf sagði fórnarlambið að hún hafi talið Elías vera Börk út af því hvernig hann talaði við hana og hvað hann sagði. Í ákæruskjali kemur fram að á meðan Elías misþyrmdi henni á hann að hafa sagt við hana að hún hefði ekki átt að „fokkast í þessari fjölskyldu".

Þá bar Grétar Sigurðsson einnig vitni í málinu. Sá var dæmdur árið 2004 í svokölluðu líkfundarmáli. Ástæðan fyrir því að hann bar vitni var sú að hann átti að hafa tekið nektarmyndir af Andreu sem finna mátti í símanum sem fórnarlambið hafði undir höndum og deilan snérist að mestu um. Grétar neitaði að hafa tekið myndirnir og sagðist ekki hafa staðið í framhjáhaldi með Andreu eins og það er orðað í dómnum.

Aftur er minnst á Grétar Sigurðsson í smáskilaboðum sem Andrea sendi á þrjá einstaklinga. Þar kemur fyrir orðalagið „veiðileyfi" sem var meðal þess sem ítrekað var bent á í gæsluvarðhaldsúrskurðum.

Skilaboðin hljóðuðu svo: „Veiðileyfi á A [fórnarlambið] var gefið út á A fyrir skömmu. Kvikindið hótaði fjölskyldu minni, reyndi að kúga X [Einar „Boom" Marteinsson, fyrrverandi forseta Hells Angels], drullaði yfir Grétar og Hilmar Leifs blandast í umræðuna líka. Endilega láttu það berast, gæskan."

Andrea játaði að hafa sent skilaboðin í yfirheyrslum. Hún sagðist hafa heyrt þetta orðalag hjá gömlum vini fórnarlambsins, en þá talaði hann um „open season" á fórnarlambið og sagði Andrea að sér hefði fundist þetta sniðugt og ákveðið að nota orðalagið „veiðileyfi".

Eins og áður hefur komið fram þá voru þrír dæmdir fyrir að koma með beinum hætti að árásinni. Andrea hlaut þyngsta dóminn. Öll voru þau sýknuð af ákæru um skipulagða brotastarfsemi. Þá var Einar „Boom" Marteinsson, fyrrverandi forseti Hells Angels sýknaður alfarið.