Völva 2013: Magnús Scheving í málaferlum

Ungt listafólk blómstrar sem aldrei fyrr og margar spennandi hugmyndir og verk koma frá því á árinu að mati Völvu Lífsins.

Baltasar í aðalhlutverki

Líf færist enn á ný í kvikmyndagerð. Ég sé Baltasar Kormák í aðalhlutverki. Þar á hann stórleik sem á eftir að færa honum verðlaun. Hann verður mjög upptekinn erlendis á árinu í leik en einnig er einhver leikstjórn þar. Hann hefur því ekki mikinn tíma til að vinna í leikhúsunum hér á árinu.

Breytingar hjá Elvu Ósk

Elva Ósk Ólafsdóttir mun sinna nýjum málum á árinu, mér finnst það ekki tengjast leik heldur í sambandi við fjölmiðla og kynningar einhvers konar. Hún verður mikilvægur tengiliður til erlendra framleiðenda.

Sveppi framleiðir heita söluvöru

Sveppi, Sverrir Þór Sverrisson, er enn að senda frá sér vöru sem selst. Hann leikur í kvikmynd á árinu og munu margir segja að þetta sé það besta sem komið hefur frá honum.

Hilmir Snær fær eftirsótt verðlaun

Hilmir Snær Guðnason á eftir að leika hlutverk á árinu sem færir honum eftirsótt verðlaun en hann þarf að passa upp á heilsuna, það er orkuleysi í kringum hann sem orsakast af einhverjum veikindum.

Björn Thors lítið áberandi

Björn Thors er enn að gera það gott. Hann verður lítið áberandi fyrri hluta ársins en með haustinu mun hann vera með aðalhlutverk sem tekið verður eftir.

Ólafur heldur áfram að meika það

Ólafur Darri Ólafsson mun verða áberandi á árinu fyrir leik í að minnsta kosti tveimur kvikmyndum, önnur myndin tengist erlendu kvikmyndafyrirtæki. Almennt mun kvikmyndaiðnaðurinn blómstra á árinu.

Magnús leitar réttar síns Íþróttaálfurinn Magnús Scheving eignast enn fleiri tvífara á árinu og mun vilja leita réttar síns í því sambandi. Það er ekki bara í Ameríku heldur sýnist mér hann vera eitthvað að leiðrétta sinn hlut í Asíu og Ástralíu.

Völva 2013: Ósætti innan Vesturports.