Sigmundur himinlifandi með kosningarnar

„Þetta var skemmtilegur dagur, mikil stemning. Ég er handviss um að það séu allir mjög kátir með niðurstöðuna. Þeir sem komust ekki á listann eru að sama skapi sáttir og ætla að vinna með okkur í þessu."

Þetta segir Sigmundur Davíð Gunnlaugsson, formaður Framsóknarflokksins. Sigmundur hlaut tæp 63 prósent atkvæða í kosningu um efsta sæti lista Framsóknarflokksins í Norðausturkjördæmi í dag.

Hann segist vera himinlifandi með kosninguna.

„Kosningabaráttan gekk mjög vel fyrir sig," segir Sigmundur. „Við frambjóðendurnir ferðuðumst saman um kjördæmið og áttum hina bestu samkeppni."

Mikið hefur verið rætt um kosningarnar í dag en Höskuldur Þór Þórhallsson var í öðru sæti í í Norðvesturkjördæmi fyrir síðustu kosningar. Sigmundur Davíð ákvað hinsvegar að sækjast eftir fyrsta sæti. Höskuldur hafnaði í öðru sæti 67 prósent atkvæða.

Sigmundur segist ekki hafa áhyggjur af því að erfitt verði að vinna með Höskuldi eftir kosningarnar.

„Þvert á móti. Ég hef rætt við Höskuld og það er allt í góðu á milli okkar. Við stóðum í þessari kosningabaráttu saman og það fer vel á með okkur."

„Ég er mjög bjartsýnn á framhaldið. Við erum með öfluga framboðslista og nú er bara að horfa til alþingiskosninganna í vor," segir Sigmundur að lokum.