Hirðin staðfestir að Kate er ólétt

Breska konungshirðin hefur staðfest að Vilhjálmur, prins Breta, og Kate Middleton, eiginkona hans, eiga von á barni. Sögusagnir um þetta hafa verið á kreiki að undanförnu. Hafa helstu slúðurmiðlar sagt frá þeim sögusögnum, en hirðin hefur ekkert viljað láta uppi. Þögnin var svo rofin í dag.

Í tilkynningu frá hirðinni segir að Kate hafi í dag verið lögð inn á King Edward VII spítalann í miðborg Lundúna með mikla morgunógleði og búist er við því að hún verði á spítala í nokkra daga. Meðgangan mun ekki vera mjög langt komin.

Vilhjálmur prins og Kate prinsessa giftu sig í apríl í fyrra. Gríðarlegur áhugi var á brúðkaupinu og fylgdust milljónir manna með beinni útsendingu á brúðkaupsdaginn.

Nánar má lesa um Vilhjálm og Kate á vef Telegraph.