Óttast að ríkið muni handstýra leiguverði í landinu

Félag löggiltra leigumiðlara óttast að ríkið muni handstýra leiguverði í landinu með nýju leigufélagi á vegum Íbúðalánasjóðs. Þá finnst félaginu skrítið að leigufélagið ætli ekki að nota þjónustu löggiltra leigumiðlara.

Í fréttum okkar í gær sögðum við frá því að Íbúðalánasjóður stefi að því að stofna sjálfstætt leigufélag í eigu ríkisins með allt að sjö hundruð íbúðum til útleigu í lengri tíma.

Guðbjartur Hannesson velferðarráðherra segir að með félaginu megi koma á jafnvægi á leigumarkaðnum.

Svanur Guðmundsson formaður félags löggiltra leigumiðlara segir leigumiðlara gleðjast yfir því að þetta félag sem hefur verið í umræðunni lengi sé loksins að verða að veruleika og framboð á leigumarkaði muni aukast í kjölfarið.

„Félagið líst okkur vel á, framkvæmdin eins og þeir virðast ætla að framkvæma þessa hluti líst okkur bölvanlega á, því að ef að mér heyrist núna af fréttum þá munu þeir ætla sér að handstýra verðinu á leigumarkaði og það er eitthvað sem kann ekki góðri lukku að stýra," segir Svanur.

Þannig muni þeir sem eru að leigja af þessu félagi vera í betri aðstöðu en aðrir á almennum leiguverði og það muni ýta undir spillingu. Þá sé sérstaklega athugunarvert að leigufélagið ætli sér ekki að nota löggilta leigumiðlara við að leigja út íbúðirnar og Svanur segir það jafnvel varða við samkeppnislög.

„Af hverju vilja þeir ekki nota leigumiðlara eins og þegar þeir selja fasteignir þá nota þeir fasteignasala?" spyr Svanur og bætir við:

„Leigumiðlarar voru settir á til þess að gæta hagsmuna og vera með rétt verð á leiguverði og gæta hagsmuna leigusala og leigjenda, settir á með lögum, en nú ætlar ríkið ekki einu sinni að notfæra sér þau lög sem þeir settu sjálf."