Dæmdar miskabætur vegna gæsluvarðhalds

Héraðsdómur Reykjavíkur hefur dæmt íslenska ríkið til þess að greiða karlmanni 400 þúsund krónur í miskabætur út af gæsluvarðhaldi sem hann sætti í janúar árið 2010.

Maðurinn var úrskurðaður í varðhald eftir að útlendur maður var handtekinn eftir að hann flutti inn rúmlega 3,7 kíló af 4-flúoróamfetamíni. Sá sagði til mannsins, sem er íslenskur, og sagði hann hafa staðið að skipulagningu innflutningsins.

Málið var í raun hið sérkennilegasta, því efnið reyndist ekki vera ólöglegt hér á landi þá, þrátt fyrir augljósa tengingu við amfetamín. Mennirnir voru sýknaðir í Héraðsdómi Reykjaness á þeim grundvelli. Aftur á móti vildi maðurinn meina að lögreglu hefði verið kunnugt um að efnið væri ekki ólöglegt á meðan hann sat enn í gæsluvarðhaldi.

Í niðurstöðu dómsins segir að þegar í ljós kom að efnið væri ekki ólöglegt hefði það átt að leiða til þess að maðurinn yrði leystur úr gæsluvarðhaldi. Hafi rannsakendur óttast að hann myndi reyna að koma sér undan málssókn gátu þeir beitt vægara úrræði svo sem að krefjast farbanns en það var ekki gert.

Því var ríkið dæmt til þess að greiða honum 400 þúsund krónur í miskabætur.