Guðbjartur Hannesson býður sig fram

Guðbjartur Hannesson velferðarráðherra hefur ákveðið að bjóða sig fram sem formaður Samfylkingarinnar. Hann tilkynnti þetta í bréfi til flokksfélaga sinna í dag. Guðbjartur er ekki eini maðurinn sem hefur boðið sig fram því áður hafði Árni Páll Árnason lýst yfir framboði.

„Ég bjartsýnn," segir hann aðspurður um hvernig honum lítist á baráttuna um formannssætið. Hann segist vera að taka ákvörðun um framboðið frekar seint en það sé góður tími til stefnu. „Og ég fer bara mjög bjartsýnn inn í þá vinnu og treysti á að slagurinn verði málefnalegur og að við getum átt góða málefnalega rökræðu," segir hann.

Guðbjartur segist hafa fengið fjölmargar áskoranir um framboðið en hann vilji ekki nafngreina neinn í þeim efnum.

Niðurstöður forvals hjá Samfylkingunni í kjördæmi Guðbjarts, Norðvesturkjördæmi, lágu fyrir í gær. Guðbjartur fékk góða kosningu og mun leiða listann í næstu kosningum.