Færri konur í glasafrjóvgun

Glasafrjóvgunum er að fækka og nær enginn biðlisti er eftir því að komast í meðferð en fyrir ári var hann fjórir mánuðir. Læknir segir marga setja fyrir sig aukinn kostnað eftir að dregið var úr niðurgreiðslu ríksins og suma fresta meðferðum.

Það var í byrjun árs sem að Sjúkratryggingar Íslands drógu úr niðurgreiðslu á meðferðum hjá ART Medica og nú ellefu mánuðum seinna er áhrifanna farið að gæta.

Fyrir tæpu ári síðan var biðlisti eftir því að komast í glasa- eða smásjárfrjóvgun um fjórir mánuðir.

„Það er eiginlega enginn biðlisti lengur þannig það eru færri pör að koma á biðlista sem þýðir bara að meðferðum er að fækka," segir Þórður Óskarsson, læknir hjá ART Medica.

Þórður segir marga þeirra sem hafa samband hikandi þegar þeir átta sig á því hver kostnaðurinn er.

„Fólk er að setja fyrir sig kostnaðinn eðlilega og jafnvel að fresta meðferðum og segja að nú þurfi það að fara að safna. Sumir hafa möguleika að fá einhverja aðstoð frá stéttarfélögum en þessi verulega minnkun á niðurgreiðslu hefur svo sannarlega sín áhrif," segir Þórður.

Þórður segir misjafnt hversu margar meðferðir fólk þurfi að fara í en oft geti þurft þrjár til fimm meðferðir í þeim tilfellum geti heildarkostnaðurinn verði um milljón. Aukinn kostnaður geti haft áhrif á það hverjir hafi efni á að fara í glasafrjóvgun.

„Við sjáum nú kannski svolítið hvernig þetta er í Bandaríkjunum þar er þessi meðferð fyrir þá efnameiri má segja þar kostar hver meðferð kannski alveg upp undir tvær milljónir bara ein meðferð og fólk kannski hefur efni á að fara einu sinni í meðferð og ekki aftur nema þeir efnameiri þeir geta farið oftar það er viss hætta á að þetta fari í þessa átt," segir Þórður.