Fæðingaorlofsgreiðslur hækka um 50 þúsund

Fæðingarorlofið lengist í tólf mánuði og hámarksgreiðslur sjóðsins hækka um 50 þúsund krónur á mánuði ef nýtt frumvarp velferðarráðherra nær fram að ganga. Ráðherra vonast til að með því verði hægt að tryggja að fæðingartíðni haldist áfram há hér á landi.

Ríkisstjórnin samþykkti frumvarpið á fundi sínum í morgun. Í því er gert ráð fyrir að hámarksgreiðsla úr sjóðnum hækki úr 300 þúsund krónum á mánuði í 350 þúsund krónur strax um áramótin. Velferðarráðherra vonast svo til að hægt verði að hækka hámarksgreiðslu í 450 þúsund krónur á næstu tveimur árum.

Þá hækka skerðingarmörk hjá þeim sem eru með laun yfir 250 þúsund krónum úr 75% í 80%. Í dag fær sá sem er með 400 þúsund krónur í laun 300 þúsund krónur frá sjóðnum en fær 320 krónur ef frumvarpið fer í gegn.

Þá gerir frumvarpið einnig ráð fyrir að réttur foreldra barna sem eru langveik eða fötluð verð rýmkaður.

Ein stærsta breytingin er lengin fæðingarorlofsins úr níu mánuðum í tólf. Það verður gert í áföngum. Í dag á hvort foreldri um sig rétt á að vera í þrjá mánuði í fæðingarorlofi og svo eiga foreldrara rétt á þremur mánuðum saman. Gert er ráð fyrir að sameiginlegur réttur foreldra lengist um einn mánuð á árinu 2014. Árið 2015 verður fæðingarorlofið svo ellefu mánuðir þegar orlofið lengist um hálfan mánuð hjá hvoru foreldri. Árið 2016 verður það svo tólf mánuðir þegar orlofið lengist aftur um hálfan mánuð hjá báðum.

Foreldrum sem taka fæðingarorlof hefur fækkað á undanförnum misserum, sérstaklega feðrum. Velferðarráðherra vonast til að þessar breytingar stöðvi þá þróun.

„Það er verið að búa betur í hag þeirra sem að vilja eiga börn og tryggja það að við verðum áfram með svona háa fæðingartíðni sem við höfum haft á íslandi."

Frumvarpið verður lagt fyrir Alþingi strax eftir helgi og vonast ráðherra til að hægt verði að ljúka afgreiðslu þess fyrir áramótin.