Ung stúlka áreitt í gegnum tölvuleik

Níu ára stúlka varð fyrir kynferðislegu áreiti af hálfu erlends manns þegar hún spilaði vinsælan töluveik á netinu og rannsakar lögregla nú málið. Alls ekki einsdæmi segir framkvæmdastjóri landssamtaka foreldra.

Foreldrar nemenda í Ingunnarskóla í Reykjavík fengu í þessari viku bréf frá skólayfirvöldum þar sem þeir voru beðnir um að fylgjast vel með tölvunotkun barna sinna. Ástæðan er sú að níu ára stúlka, sem er nemandi við skólann, var að spila vinsælan leik, ClubPenguin, sem býður upp á svokallað leikmannaspjall. Annar notandi fór að spjalla við stúlkuna ungu og það á mjög klámfenginn hátt. Samtalið fór fram á ensku en móðir hennar uppgötvaði hvað var á seyði þegar dóttirin spurði hvað „dirty" þýddi. Málið er nú komið inn á borð kynferðisbrotadeildar lögreglu.

Fleiri sambærilegir leikir eru á netinu og berast samtökunum Heimili og skóli reglulega ábendingar um álíka mál.

„Þar sem að foreldrar annaðhvort gera okkur viðvart eða haft er samband til dæmis í gegnum ábendingarhnappinn sem að SAFT verkefnið lét upp fyrir um ári síðan og er hýstur á veg Barnaheilla," segir Hrefna Sigurjónsdóttir, framkvæmdastjóri Heimilis og skóla.

Hrefna hvetur foreldra eða aðra sem verða vitni að samskiptum sem þessum að geyma allar upplýsingar.

„Taka skjámynd eða geyma upplýsingar um notandann eða eitthvað slíkt. Ef þetta er á Facebook þá er hægt að láta stjórnendur Facebook vita en síðan líka að láta aðra foreldra vita svo þeir geti passað upp á börnin sín og svo að sjálfsögðu að ræða við barnið. Ræða um hvað þarf að varast, hvað má og hvað ekki. Þetta er svona svipað og að kenna umferðarreglurnar eða kenna börnum að fara ekki eitthvað með ókunnugum. Þau þurfa að læra hvernig þau eiga að haga sér á netinu," segir Hrefna.