Fótalaus bílstjóri endurnýjaði meiraprófið

Stætóbílstjóri sem missti báða fætur í slysi fyrir sjö árum stóðst hæfnispróf og heldur meiraprófinu sínu. Hann langar að fara vinna aftur en er ekki viss að hann treysti sér í fullar vaktir og er auk þess efins um að fólk vilji fá fólk eins og hann til starfa.

19. ágúst árið 2005 var Björn Hafsteinsson við vinnu sína sem strætóbílstjóri. Á gatnamótum Kringlumýrarbrautar og Suðurlandsbrautar ók vörubíll yfir á rauðu ljósi og lenti á strætónum. Tíu manns voru um borð en allir sluppu nær ómeiddir nema Björn.

„Það var nú svo skrítið að ég missti aldrei meðvitund. Ég sat þarna á götunni og hélt á stúfnum, eða stúfunum. Svo kom lögreglumaður, tók af sér beltið sitt og batt um fótinn,“ segir Björn.

Báðir fótleggir voru teknir af Birni fyrir neðan hné og eftir langa sjúkrahúsvist tók við ströng endurhæfing. Björn segist ánægður með nýju fæturna en þyki sárt að hafa verið kippt út af vinnumarkaðinum fyrir aldur fram. Hann ákvað því að endurnýja meiraprófið sitt og stóðst hæfnispróf. Í viðtali við Fréttatímann í dag að hann hefði ekki geta hugsað sér að missa það eftir að hafa haft það í þrjátíu ár. En býst hann við að komast í vinnu?

„Það vill enginn svona menn í vinnu,“ segir hann.

Finnur þú fyrir svona miklum fordómum?

„Nei en maður bara heldur það. Maður getur ekki gert allt sko,“ segir hann.

Björn segist ánægður með gervifæturna frá Össurri og almennt líða nokkuð vel. Hann verði þó að taka lyf við svokölluðum draugaverkjum sem lýsa sér í verkjum í útlimum sem eru ekki lengur til staðar.

Hann segir þó mikilvægast að leyfa sér ekkert volæði.