Sextán daga átak gegn kynbundnu ofbeldi

Ljósaganga UN Women á Íslandi fer fram klukkan sjö í kvöld en gangan markar upphaf 16 daga átaks gegn kynbundnu ofbeldi og er jafnframt síðasti Appelsínuguli dagurinn í ár. Gangan hefst í Alþingisgarðinum og gengið verður að Bíó Paradís við Hverfisgötu.

Þar verða þær Hildur Lillendahl og Hanna Björg Vilhjálmsdóttir heiðraðar fyrir framlag sitt í baráttunni gegn kynbundu ofbeldi á árinu og munu þær leiða gönguna. Alþjóðadagur Sameinuðu þjóðanna gegn kynbundnu ofbeldi er haldinn ár hvert 25. nóvember.

Í tilkynningu segir að ekki sé til það samfélag á jarðríki þar sem konur þurfa ekki að líða ofbeldi vegna kyns síns. „Grófasta form slíks ofbeldis er án efa kerfisbundin morð á konum og stúlkum eða kvennamorð. Þessi hrikalegu brot á mannréttindum kvenna fyrirfinnast í öllum löndum og samfélögum þó birtingarmyndir þeirra séu oft ólíkar."

Að göngunni lokinni verður verðlaunamyndin Skemmd epli (Tyrannosaur) sýnd í Bíó Paradís en myndin er hluti af Reykjavík European Film Festival og rennur allur ágóði til UN Women á Íslandi. Miðaverð er 1000 krónur og boðið verður upp á kakó og smákökur eftir gönguna.