Söguleg sigling um Norðurheimskautið

Gríska tankskipið Ob River, með 40 skipverja um borð og hátt í 150 þúsund rúmmetra af jarðgasi í vökvaformi, lagði úr höfn í Noregi á dögunum. Förinni er heitið til Japan en skipið mun sigla yfir norðurheimskautið. Ob River verður fyrsta flutningaskipið til nýta sér þessa siglingaleið.

Flutningaskipið er ísstyrkt og sérútbúið til siglinga á norðurslóðum.

Það er rússneski orkurisinn Gaszprom sem er bakhjarl verkefnisins. Talsmaður fyrirtækisins segir að leiðangurinn hafi verið í undirbúningi í rúmt ár.

Þannig vill fyrirtækið nýta sér þær sjóleiðir sem opnast hafa á norðurheimskautinu í kjölfar loftslagsbreytinga. Verkefnið er afar þýðingarmikið fyrir Gazprom enda hefur orkumarkaðurinn, þá sérstaklega með tilliti til jarðgass, verið afar óstöðugur síðustu misseri.

„Þetta er stórfenglegt ævintýri," sagði Tony Lauritzen, viðskiptastjóri, í samtali við BBC. „Nokkrir skipverjar hafa nú þegar séð nokkra hvítabirni."

Þessi nýja siglingaleið styttir hefðbundinn sendingartíma um 20 daga.

„Við getum nú nálgast arðbæran markað á methraða og um leið notum við 40 prósent minna eldsneyti," sagði Lauritzen.