Hádegismatur skólabarna hækkaður í Hafnarfirði

Meirihluti fræðsluráðs Hafnarfjarðar samþykkti í dag fjárhagsáætlun fræðslusviðs 2013. Þar kemur meðal annars fram að allar gjaldskrár hækki næsta haust sem svarar verðbólgu, sem er um 4% samkvæmt verðbólguspá, nema matur í leik- og grunnskólum, sem hækki í samræmi við vísitöluhækkun matar og drykkjar, sem er nokkuð meiri.

Áheyrnarfulltrúi foreldra grunnskólabarna bókaði mótmæli við þessu. Foreldraráð Hafnarfjarðar lýsti því yfir áhyggjum sínum á hækkunum á gjaldskrá hádegismatar nemenda í grunnskólum sem koma munu harkalega niður á fjölskyldum í bænum að þeirra mati.

Meðal þess sem fram kemur í fjárhagsáætlun fræðslusviðs er að byggt verði íþróttahús með fjórum kennslustofum við Áslandsskóla og tekið í notkun haustið 2013.

Rekstrarkostnaður er nettó allt að 14 milljónum króna á næsta ári, en framkvæmdin yrði fjármögnuð af fasteignafélaginu. Húsið yrði í eigu bæjarins frá upphafi. Fyrirvari er um að samningar náist við eigendur Áslandsskólalóðarinnar undir þetta nýja hús.

Einnig var samþykkt að ráðinn verði talmeinafræðingur á Skólaskrifstofu, en nokkur biðlisti hefur myndast vegna aukinnar þarfar fyrir talmeinaþjónustu í leik- og grunnskólum. Foreldráð Hafnarfjarðar fagnar því sérstaklega.

Fulltrúar Sjálfstæðisflokks sitja hjá við afgreiðslu fjárhagsáætlunar fræðslusviðs í fræðsluráði og ætla þess í stað fjalla um fjárhagsáætlun Hafnarfjarðarbæjar í heild sinni í bæjarráði og í bæjarstjórn.