Braut rúðu til þess að tala við fyrrverandi kærustuna

Lögreglan í Vestmannaeyjum hafði í mörg horn að líta í vikunni án þess þó að um alvarleg mál hafi verið að ræða. Skemmtanahald helgarinnar gekk ágætlega fyrir sig en þó var eitthvað um kvartanir frá heimahúsum sökum hávaða. Eftirfarandi kemur fram í dagbók lögreglunnar þar í bæ:

Fimm eignaspjöll voru tilkynnt til lögreglunnar í vikunni sem leið. Fjögur af þeim áttu sér stað á geymslustæði fyrir smábáta þar sem gamli slippurinn var. Þarna höfðu rúður verið brotnar í bátum sem þarna eru geymdir. Ekki er vitað hvenær skemmdirnar áttu sér stað né hverjir þarna voru að verki. Þeir sem hafa upplýsingar um það eru vinsamlegast beðnir um að hafa samband við lögreglu.

Fimmtu eignaspjöllin voru tilkynnt til lögreglu föstudaginn 23. nóvember sl. og áttu þau sér stað í heimahúsi en þarna hafði maður brotið sér leið inn í húsið og vildi ná tali af fyrrverandi kærustu sinni. Braut hann rúðu í útidyrahurð til að komast inn í húsið. Engin meiðsl urðu á fólki vegna þessarar hegðunar mannsins.

Tvö vinnuslys voru tilkynnt lögreglu í vikunni og átti annað sér stað í fiskverkun Eyjabergs föstudaginn 23. nóvember sl. þar sem maður lenti með annan fótinn undir lyftara. Ekki var um alvarlega áverka að ræða.Hitt slysið átti sér stað við löndun úr Huginn VE þann 25. nóvember sl. þar sem maður sem var að vinna við löndun klemmdist á fingri. Báðir þessir menn leituðu til læknis á Heilbrigðisstofnun Vestmannaeyja.

Eitt umferðaróhapp var tilkynnt lögreglu í vikunni og átti það sér stað föstudagskvöldið 23. nóvember sl. á bifreiðaplaninu við Íþróttamiðstöðina. Þarna hafði ökumaður jeppa verið að aka afturábak og lenti á kansteini með þeim afleiðingum að hann missti stjórn á bifreiðinni sem valt og endaði á toppnum. Lítil sem engin meiðslu urðu á þeim sem í bifreiðinni voru.