Hanna Birna útilokar formannsframboð gegn Bjarna

Hanna Birna Kristjánsdóttir, sem fékk yfirburðakosningu í fyrsta sætið hjá sjálfstæðismönnum í Reykjavík, útilokar formannsframboð gegn Bjarna Benediktssyni á næsta landsfundi. Þá segist hún, rétt eins og formaðurinn, vilja slíta aðildarviðræðum við Evrópusambandið.

Hanna Birna fékk 74 prósent gildra atkvæða í fyrsta sætið í prófkjöri sjálfstæðismanna á laugardag.

Hún mun því leiða lista flokksins í öðru Reykjavíkurkjördæminu og hefur hún ákveðið að taka oddvitasætið í Reykjavíkurkjördæmi suður.

Margir telja að þessi yfirburðakosning sé gott veganesti í formannsframboð á landsfundi og talað er um að þrýst verði á Hönnu Birnu að skora Bjarna Benediktsson á hólm að nýju.

„Ég útiloka ekki að bjóða mig einhvern tímann fram í embætti formanns Sjálfstæðisflokksins. Ég hins vegar bauð mig fram fyrir ári síðan og þá fengu landsfundarfulltrúar tækifæri til þess að velja einstakling til þess að leiða þá inn í næstu alþingiskosningar. Bjarni Benediktsson vann þá kosningu og ég tel að tíma mínum sé betur varið á næstu mánuðum við að tryggja það að við náum hér góðum sigri í Reykjavík en að fara í slag aftur á landsfundi," segir Hanna Birna í samtali við fréttastofu.

Þannig að þú útilokar formannsframboð á næsta landsfundi? „Já, að svo komnu máli er ég ekki að bjóða mig fram á landsfundi gegn sitjandi formanni. Ekki í febrúar."

En útilokar ekki varaformannsframboð? „Ég hef enga ákvörðun tekið með það. Það er nógur tími til þess að ákveða það og við sjáum hvað setur með það."

Eftir þennan góða árangur Hönnu Birnu hefur verið gerð sú krafa til hennar að hún geri skýra grein fyrir afstöðu sinni til veigamestu mála í þjóðmálaumræðunni. Eitt þessara mála er hugsanleg aðild Íslands að Evrópusambandinu.

„Ég tel að við eigum að slíta þessum viðræðum en ég er líka sammála ályktun landsfundar um að það eigi að bera það undir þjóðina og við munum una þeirri niðurstöðu," segir Hanna Birna.

Fyrir slíka atkvæðagreiðslu, myndir þú berjast fyrir því að viðræðunum yrði slitið? „Já."