Sigríður Ingibjörg svarar: Vandinn hverfur ekki þótt um hann sé þagað

„Þetta sýnir að það er titringur á markaðnum, segir Sigríður Ingibjörg Ingadóttir, þingmaður Samfylkingarinnar og formaður velferðarnefndar Alþingis. Sigríður sagði í morgun að breyta þurfi skilmálum á skuldabréfum Íbúðalánasjóðs. Lokað var fyrir viðskipti með bréfin í Kauphöll Íslands strax á eftir. Páll Harðarson, forstjóri Kauphallarinnar, gagnrýndi fyrr í dag ummæli Sigríðar Ingibjargar og sagði þau óheppileg.

Sigríður Ingibjörg bendir á að nú sé búið að ákveða að veita þrettán milljörðum í Íbúðalánasjóð. Þetta fjármagn, sem kemur úr ríkissjóði, bætist við 33 milljarða sem settir voru í sjóðinn árið 2010.

„Vandinn hverfur ekki þótt um hann sé þagað, segir Sigríður Ingibjörg. „En hann er margþættur og ein af afleiðingum hrunsins," segir Sigríður Ingibjörg.