Stúdentakjallarinn "þjófstartar" á laugardaginn

Langþráður draumur þjakaðra háskólanema í prófatörn verður loks að veruleika á laugardaginn næsta þegar Stúdentakjallarinn opnar við Háskólatorg. Ekki verður þó um eiginlega opnun að ræða því enn á eftir að útvega vínveitingaleyfi, leggja lokahönd á húsnæðið og fleira í þeim dúr.

„Við köllum þetta þjófstart," segir Sara Sigurðardóttir, formaður Stúdentaráðs. „En það stóð alltaf til að opna 1. desember og við ætlum að standa við það, leyfa fólki að sjá staðinn og vera með smá dagskrá."

Sérstakt boðskort verður sent til allra nemenda háskólans á morgun og þeim boðið að koma og taka nýja staðinn út. Staðurinn verður hins vegar ekki opinn yfir prófatörnina að þessu sinni enda er hann ekki alveg tilbúinn. Markmiðið er að full starfsemi hefjist um miðjan desember eða fyrir áramót.

Starfsfólk Stúdentakjallarans verða að mestu leyti nemendur. „En nemendur þurfa auðvitað að fara í próf, eins og gengur og gerist og þess vegna er nauðsynlegt að hafa einhverja sem ekki eru við nám í háskólanum," segir Sara.

„Það verður sál í Stúdentakjallaranum," segir Sara sem er ekki í neinum vafa um að staðurinn verði hlýlegri og meira kósí en Háskólatorg, sem er opin bygging sem minnir einna helst á flugvöll. „Við erum búin að vera að safna gömlum húsgögnum, endurbólstra stóla sem voru á gamla Stúdentakjallaranum og fleira. Svo þetta verður svona gamalt í bland við nýtt," segir hún.