Þrír dæmdir fyrir að hylma yfir með stórtækum bensínþjófi

Þrír karlmenn, tveir Litháar búsettir hér á landi og einn Íslendingur, voru dæmdir fyrir hylmingu í Héraðsdómi Reykjaness í dag.

Allir keyptu þeir eldsneyti af karlmanni sem borgaði fyrir það með stolnu fyrirtækjakorti. Alls sveik hann út eldsneyti fyrir 4,6 milljónir króna á tveggja ára tímabili. Sjálfur var hann dæmdur í níu mánaða óskilorðsbundið fangelsi í Héraðsdómi Reykjaness í september síðastliðnum.

Maðurinn seldi mönnunum þremur dísilolíu í sjálfsafgreiðslu Orkunnar við Kænuna í Hafnarfirði. Maðurinn seldi mönnunum lítrann á undir hálfvirði, eða á hundrað til hundrað og þrjátíu krónur lítrann.

Mennirnir áttu flestir nokkrum sinnum í viðskiptum við bensínþjófinn, en þeir sögðu að hann hefði útskýrt braskið með þeim hætti að fyrirtæki sem hann ætti væri að fara á hausinn og hann vildi fá sem mest út úr kennitölunni með því að nýta fyrirtækjakortið með þessum hætti.

Dómari telur þetta ekki sannfærandi skýringu og telur að mennirnir hljóti að hafa vitað betur. Þeir voru því allir dæmdir í 30 daga skilorðsbundið fangelsi en fresta skal fullnustu refsingarinnar og hún niður falla að liðnum tveimur árum, haldi þeir almennt skilorð.