Kærleikskúlan 2012 opinberuð og afhent

Kærleikskúlan 2012 var afhjúpuð við hátíðlega athöfn í Listasafni Reykjavíkur í dag. Það er Styrktarfélag lamaðra og fatlaðra sem stendur að verkefninu en handhafi Kærleikskúlunnar í ár er Jón Margeir Sverrisson, sundkappi og ólympíumethafi.

Jón Margeir tók við kúlunni úr hendi Kristínar Rósar Hákonardóttur sem flestir þekkja en hún er einstök afrekskona sem hefur margoft hlotið gullverðlaun á Ólympíuleikum fatlaðra.

Þetta er í tíunda sinn sem Kærleikskúlan er afhent en fyrri handhafar hennar eru meðal annars Leifur Leifsson, Valgerður Jónsdóttir og Bjöllukórinn og forseti Íslands, Ólafur Ragnar Grímsson.

Kærleikskúlan 2012 hefur hlotið nafnið Lokkandi en það var Hrafnhildur Arnardóttir sem sá um hönnun hennar. Fjölmargir þjóðþekktir listamenn hafa tekið að sér verkefnið, þar á meðal eru Erró, Ólafur Elíasson og Rúrí.

Sala Kærleikskúlunnar stendur frá 5. til 19. desember. Allur ágóði sölunnar rennur til starfsemi Reykjadals. Árlega komu um 300 börn og ungmenni í Reykjadal, sem hafa ekki vegna fötlunar sinnar kost á að sækja aðrar sumarbúðir.