Skráði lögheimili sitt í Ráðherrabústaðinn og braust fjórum sinnum inn

Karlmaður um fertugt hefur verið ákærður fyrir að brjótast fjórum sinnum inn í Ráðherrabústaðinn við Tjarnargötu í miðbæ Reykjavíkur.

Maðurinn braust fyrst inn í ágúst árið 2011 en þá braut hann rúðu í aðalhurð hússins með grjóti. Aðferðin breyttist svo lítillega eftir því sem hann braust oftar inn, þannig braut hann einu sinni rúðu í aðalhurð hússins með járnstykki sem og rúðu í útihurð á bakhlið hússins.

Síðasta innbrotið var í ágúst síðastliðnum, en þá braut hann rúðu í kjallara hússins. Í öll skiptin kom lögreglan á vettvang skömmu síðar, og í öll skiptin dvaldi maðurinn þar þegar lögreglu bar að.

Maðurinn, sem hefur margsinnis komist í kast við lögin, meðal annars fyrir ofbeldisbrot, er heimilislaus. Fyrir síðustu jól tók hann reyndar upp á því að skrá lögheimili sitt í Ráðherrabústaðinn, en staðreyndin er sú að hver sem er getur skráð lögheimili sitt hvar sem er, svo lengi sem það er í íbúðarhúsnæði.

Eftir að maðurinn hafði ítrekað brotist inn í húsið breytti þjóðskrá skráningu mannsins á síðasta ári. Hann er því óstaðsettur í hús samkvæmt ákæruskjali.

Þá vekur athygli að forsætisráðherrann sjálfur, Jóhanna Sigurðardóttir, gerir skaðabótakröfu á hendur manninum, en krafist er tæplega 800 þúsund krónur í skaðabætur. Það eru aftur á móti tveir aðrir aðilar sem gera kröfuna fyrir hönd forsætisráðherrans, sem ber ábyrgð á bústaðnum.

Það hrekkur þó skammt miðað við þá fjárhæð sem maðurinn telur ríkið skulda sér. Í frétt um málið á Stöð 2 á síðasta ári kom fram að maðurinn álítur að ríkið skuldi honum svimandi háa upphæð - og vildi hann með þessu athæfi vekja athygli á því en hann hefur gert kröfu á hendur ríkisins upp á 14,7 milljónir evra, sem jafngildir röskum tveimur milljörðum króna.

Maðurinn mætti ekki í þingfestingu málsins í Héraðsdómi Reykjavíkur morgun, og var málinu því frestað þar til hægt er að hafa uppi á manninum.