Hlýindi næstu daga

Nokkrir krakkar notuðu tækifærið og léku sér á ísilagðri Tjörninni í dag þegar ljósmyndarinn Vilhelm Gunnarsson átti leið hjá. Tjörnin hefur verið frosin síðustu daga en ekki er víst að svo verði áfram.

Eftir frosthörku síðustu daga hlýnaði nokkuð á höfuðborgarsvæðinu í dag. Samkvæmt upplýsingum frá veðurfræðingum Veðurstofu Íslands eru líkur á að ekki kólni aftur næstu daga og hitinn haldist fram á helgi.

Veðurfræðingur vildi ekkert spá fyrir um hvort Tjörnin ætti eftir að þiðna í hlýindunum. „Það fer alveg eftir þykkt íshellunnar núna," sagði hann en taldi ekki óhugsandi að hún þiðnaði. Kannski hafa því börnin gripið eitt síðasta tækifærið í bili til að renna sér á Tjörninni.