Ófremdarástand vegna lausagöngu hrossa í Eyjafirði

Ófremdarástand er að verða á vegum við Eyjafjörð vegna lausagöngu hrossa á þjóðvegum, sem komast nú allra sinna ferða þar sem girðingar eru víða á kafi í snjó.

Lögregla þurfti að sinna nokkrum slíkum útköllum í gærkvöldi og í nótt og nú voru hross komin alveg inn í bæinn.

Það hefur snjóað, hlánað og frosið á víxl í Eyjafirði að undanförnu þannig að víða ná hrossin ekki að krafsa niður úr snjónum eftir einhverri beit og leggja því á rás í leit að bithögum.

Lögreglan telur brýnt að eigendur hrossa taki þau á hús og innigjöf við þessar aðstæður.