Fermingabörn söfnuðu rúmlega sjö milljónum

Rúmlega sjö milljónir króna söfnuðust þegar fermingarbörn um land allt gengu í hús í byrjun nóvember með bauk Hjálparstarfs kirkjunnar.

Undanfari þess var fræðsla til um 2800 fermingarbarna um aðstæður í fátækum löndum Afríku, sérstaklega um skort á hreinu vatni en börnin söfnuðu nákvæmlega 7,3 milljónum króna.

Mörg þeirra hittu líka gesti frá Malaví sem heimsóttu fermingarbörn og sögðu frá lífi sínu og aðstæðum í sínu heimalandi. Féð sem safnaðist rennur til vatnsverkefna Hjálparstarfsins í Afríkulöndunum, Eþíópíu, Malaví og Úganda.

Grafnir eru brunnar og vatnsþrær og vatnstankar reistir. 67 prestaköll tóku þátt. Þetta var í fjórtánda sinn sem söfnunin fer fram.

Hjálparstarf kirkjunnar þakkar öllum sem gáfu, fermingarbörnum fyrir dugnað og prestum og kirkjustarfsmönnum samstarfið.