Gert að skoða betur hvort balletdansmær fái að sleppa við leikfimi

Umboðsmaður Alþingis hefur gert menntamálaráðuneytinu að endurskoða synjun sína á því að stúlka, sem æfir ballet fengi að sleppa við skyldunám í íþróttum. Móðir stúlkunnar kvartaði yfir úrskurði mennta- og menningarmálaráðuneytisins en hún kærði málið til ráðuneytisins eftir að skólinn synjaði beiðni konunnar.

Með úrskurðinum staðfesti ráðuneytið ákvörðun skólastjóra grunnskóla um að synja beiðni konunnar um að dóttur hennar yrði veitt undanþága frá skyldunámi í íþróttum vegna hættu á álagsmeiðslum.

Fram kom að bekkjarsystur stúlkunnar hafði verið veitt undanþága gegn framvísun læknisvottorðs. Því var hins vegar hafnað að unnt væri að leggja læknisvottorð sem móðirin framvísaði vegna dóttur sinnar til grundvallar slíkri undanþágu, meðal annars á þeim grundvelli að vottorðin tvö væru ekki sambærileg.

Móðirin taldi að ekki hefði verið gætt samræmis og jafnræðis við ákvörðunartöku í málum stúlknanna tveggja.

Settur umboðsmaður Alþingis komst að lokum að þeirri niðurstöðu að ráðuneytið hefði ekki gætt að jafnræðisreglu sem og rannsóknarreglu um að gera ráðstafanir við að afla gagna um málið. Þá helst um læknisvottorð stúlkunnar sem fékk undanþáguna.

Umboðsmaður taldi því að málsmeðferð ráðuneytisins hefði ekki verið í samræmi við rannsóknarreglu stjórnsýslulaga. Umboðsmaður taldi jafnframt að ekki hefði verið forsvaranlegt að synja beiðni stúlkunnar um undanþáguna án þess að afla frekari gagna af sérfræðilegum toga.

Þar hafði hann í huga að fyrir lá sérfræðilegt mat læknis á því að það gæti skaðað heilsu stúlkunnar að stunda frekari íþróttir í skólanum. Mæltist hann því til þess að beiðni móðirinnar um undanþágu fyrir dóttur sína yrði tekin til endurskoðunar kæmi fram beiðni þess efnis frá henni og að þá yrði tekið mið af sjónarmiðum sem væru rakin í álitinu.

Að öðru leyti tók hann ekki afstöðu til þess hvort skilyrði væru til þess að taka beiðnina til greina að hluta eða öllu leyti.