Umtalaður þáttur um umdeildan mann

Gestur Jóns Ársæls í Sjálfstæðu fólki á sunnudagskvöld verður Styrmir Gunnarsson, fyrrum ritstjóri Morgunblaðsins. "Umtalaður þáttur um umdeildan mann á sunnudagskvöld á Stöð 2,“ segir í fréttatilkynningu en nýleg bók Styrmis, Sjálfstæðisflokkurinn - Átök og uppgjör, hefur vakið mikið umtal síðustu daga. Styrmir hefur um áratugaskeið haft beinan aðgang að stjórnmálamönnum á Íslandi og setið þúsundir funda í lokuðum bakherbergjum þar sem framtíð okkar var ákveðin. Í þættinum fylgjast Jón Ársæll og Steingrímur Þórðarson tökumaður með skini og skúrum í lífi Styrmis en kona hans hefur í áratugi þurft að glíma við geðveiki og mikla sálræna erfiðleika. Þeir fylgja Styrmi einnig upp í Borgarfjörð þar sem hann var í sveit sem drengur og varð afskaplega elskur af kúm sem hann dýrkar meira en allar aðrar skepnur. Sjálfstætt fólk er á dagskrá Stöðvar 2 á sunnudagskvöld klukkan 19.50. Hægt er að kaupa áskrift að stöðinni hér.