Sýknaður af ákæru um kynferðisbrot

Hæstiréttur Íslands sýknaði í dag karlmann af ákæru um að hafa brotið kynferðislega gegn 15 ára gamalli stúlku í september árið 2010. Héraðsdómur Norðurlands vestra dæmdi manninn í sex mánaða fangelsi fyrir athæfið.

Maðurinn var sakaður um að hafa káfað tvisvar innanklæða á rassi stúlkunnar, strokið með fingrum um klof hennar innanklæða og í kjölfarið stungið þeim upp í sig og sagt að stúlkan væri flott.

Hæstiréttur telur það vera með öllu ósannað að atvikið hafi átt sér stað, enda voru engin vitni að þeirri háttsemi sem manninum var gefin að sök. Þannig stóð orð gegn orði.

Í dómi Hæstaréttar kemur fram að sálfræðingur hafi komist að þeirri niðurstöðu að ekkert hefði komið í ljós sem gæfi til kynna að frásögn stúlkunnar væri ótrúverðug. Maðurinn neitaði ávallt sök.