Þurfti áfallahjálp eftir erfiðan vinnudag

"Við höfum misst marga neyðarverði frá okkur eftir erfið mál,“ segir Tómas Gíslason aðstoðarframkvæmdastjóri Neyðarlínunnar, en starf neyðarvarðar er svo sannarlega ekki fyrir alla. Stundum þarf að taka erfiðar ákvarðanir á örskotsstundu og taka á móti símtölum sem geta reynt verulega á.

Hjördís Garðarsdóttir aðstoðarvarðstjóri hjá Neyðarlínunni hefur starfað þar í 5 ár. Líkt og fleiri samstarfsmenn hennar hefur hún þurft á áfallahjálp að halda. "Það var þegar ég hafði tekið á móti tveimur símtölum varðandi banaslys sama daginn. Eftir það síðara treysti ég mér ekki til að opna línuna aftur.“

Hjördís segir starfið þó hafa miklu fleiri kosti og lítur á það sem framtíðarstarf. "Það er engin spurning.“

Í lokaþættinum af Neyðarlínunni á Stöð 2 í kvöld kl. 20.10 verður skyggnst á bakvið tjöldin hjá Neyðarlínunni, forvitnast um hvernig starfið er og þau mál sem tekin hafa verið fyrir í þáttunum verða jafnframt rifjuð upp. Meðfylgjandi er brot úr þættinum.