Fágætar bækur á uppboði

Um hundrað og fimmtíu fágætar íslenskar bækur eru nú til sölu á bókauppboði á netinu, meðal annars bók um Stjörnufræði í þýðingu Jónasar Hallgrímssonar og ljóðabók eftir Dag Sigurðarson með vínslettum frá höfundi.

Það er fornbókaverslunin Bókin sem stendur að uppboðinu í samstarfi við Gallerí Fold en því lýkur á sunnudag.

Ari Gísli Bragason, fornbókasali, segir að uppboðið hafi gengið vel.

Er slegist um ákveðna bækur?

„Það hefur komið fyrir að að það sé svolítill slagur um nokkur rit," segir Ari.

„Við reynum að hafa þetta allar bækur sem eru áhugaverðar. Við erum t.d. núna með Hólapostillu, tvær reyndar, önnur þeirra frá 1750, prentuð á Hólum í Hjaltadal. Við erum líka með Leirgerði svokallaða, sálmabók sem er prentuð á Leirárgörðum árið 1801.

Eru þetta fágætar bækur?

„Já þær eru fágætar vegna þess að þær eru í upprunalegu bandi og heilar. Þessar gömlu bækur vilja oft skemmast," segir Ari.

Meðal verka á uppboðinu er bók um Stjörnufræði í þýðingu Jónasar Hallgrímssonar.

„Hún er í upprunalegu bandi og reyndar með bókamerki og árituð. Það eru þessar töflur hérna aftast sem eru heilar og góðar. Hér koma líka fram ný orð, sem eru reyndar notuð enn í dag eins og til dæmis skjaldbaka og fleiri orð," segir Ari.

Einnig má finna ljóðabækur eftir Dag Sigurðarson

„Hérna er Níðstöng hin meiri. Það eru campari-slettur hérna frá eigandanum sjálfum. Það er nú kannski bara skemmtilegra," segir Ari.