Átök á mili Vítisengla og Útlaga - mikill titringur vegna málsins

Átök urðu á milli meðlima vélhjólagengjanna Hells Angels og Outlaws um helgina og ríkir töluverður titringur í báðum herbúðum vegna málsins samkvæmt heimildum Vísis. Meðlimur Vítisenglanna skallaði meðlim Outlaws í andlitið á bifvélaverkstæði um helgina. Ástæðan var sú að sá sem var skallaður var klæddur í peysu merktri Outlaws.

Vítisengillinn, sem var með nokkrum félögum úr klúbbnum, skipaði þá Útlaganum að klæða sig úr peysunni. Þegar sá neitaði skallaði Vítisengillinn Útlagann í andlitið. Félagi Vítisengilsins skarst þá í leikinn og kom í veg fyrir frekari átök.

Samkvæmt heimildum Vísis varð strax mikill titringur vegna málsins í báðum herbúðum. Meðal annars nýttu meðlimir Útlaganna Facebook til þess að koma hótunum á framfæri við klúbbinn og mátti litlu muna að frekari átök brytust út.

Hvorugur klúbburinn vill hinsvegar lenda í átökum í ljósi mikils þrýstings sem lögreglan beitir vélhjólagengin með eftirliti sínu, og hafa því meðlimir Vítisenglanna boðið fram sáttarhönd. Útlagarnir segja að ekki verði hægt að semja frið nema að sá sem sló Útlagann hljóti sömu örlög, það er að segja að hann þoli einhverskonar barsmíðar, eða kjaftshögg í besta falli.

Vítisenglarnir hafa ekki þekkst boðið að því er Vísir kemst næst, en meðlimir Útlaganna eru samkvæmt heimildum ekki sveigjanlegir hvað þetta varðar. Þess má geta að þetta sérkennilega réttlæti hefur áður verið beitt á milli klúbbanna í átökum þeirra á milli.

Helgin hjá Vítisenglunum hefur aftur á móti verið viðburðarrík en mikil grillveisla var haldin í klúbbahúsnæði vélhjólaklúbbsins Devils Choice í Garðabæ, sem á að vera stuðningsklúbbur Vítisenglanna. Samkvæmt heimildarmanni sem Vísir ræddi við þá mátti finna fjölda erlendra Vítisengla í veislunni, en það hefur ekki fengist staðfest.

Sýslumannsembættið á Keflavíkurflugvelli hefur hingað til brugðist mjög hart við þegar útlendir Vítisenglar reyna að komast til landsins. Þeim hefur umsvifalaust verið snúið til baka.