Fyrrverandi ríkissaksóknari segir orð Jóns Steinars fordæmalaus

Það er algjörlega fordæmalaust af fyrrverandi hæstaréttardómara að segja að saklaus maður sitji í fangelsi. Þetta segir Valtýr Sigurðsson, fyrrverandi ríkissaksóknari, í tilefni af ummælum Jóns Steinars Gunnlaugssonar.

Jón Steinar sagði í þættinum Klinkinu hér á Vísi um helgina að hugsanlega sæti saklaus maður í fangelsi vegna dóms Hæstaréttar í nauðgunarmáli. Jón Steinar hefur tvisvar eftir að hann lét af embætti dómara gagnrýnt réttinn fyrir að hafa slakað á kröfum um sönnunarfærslu. Hann hefur jafnframt sagt að hann hafi fundið fyrir mótbyr fram samdómurum sínum í Hæstarétti.

Valtýr Sigurðsson, fyrrverandi ríkissaksóknari, segist telja að Jón Steinar Gunnlaugsson hafi ekki átt erindi í Hæstarétt á sínum tíma. Í aðsendri grein í Fréttablaðinu í dag ýjar hann að því að Jón Steinar hafi hreinlega verið vanhæfur í kynferðisbrotamálum vegna skoðana sinna og segir umfjöllun hans um réttinn síðustu daga ósanngjarna og til þess fallna að draga úr trúverðugleika réttarins.

Valtýr segir að mótlætið sem Jón upplifði í Hæstarétti megi líklega rekja til persónuleika hans sjálfs. Jón hafi verið góður málflytjandi en hafi alltaf átt erfitt með að taka því þegar ekki var fallist á skoðanir hans og því hafi dómarastarfið hentað honum illa.

Valtýr segir skoðanir Jóns Steinars á sönnunarfærslu afar alvarlegar og hreint ekki hefðbundnar eða viðurkenndar. Jón telur að svonefnd óbein sönnunargögn hafi lítið sem ekkert vægi í sönnunarfærslu. Valtýr rifjar upp að árið 2008 sendi hann sem ríkissaksóknari sent bréf til Hæstaréttar þar sem farið var fram á að Jón Steinar viki sæti í kynferðisbrotamáli vegna skoðana hans.

Ef fallist væri á skoðanir Jóns yrði væntanlega óhjákvæmilegt að sýkna í nær öllum kynferðisbrotamálum að mati Valtýs. Þess vegna þótti seta Jóns í Hæstarétti skapa alvarleg vandamál í kynferðisbrotamálum.