Jóhanna hvöss í garð fjármálastofnanna: Lánin þarf að endurreikna strax!

Jóhanna Sigurðardóttir forsætisráðherra segir að frekari undansláttur fjármálastofnanna varðandi útreikninga erlendra lána verði ekki liðinn - lánin þurfi að endurreikna strax. Þetta kom fram í ræðu hennar á flokkstjórnarfundi Samfylkingarinnar sem fer fram á Natura í dag.

Í ræðu sinni kom hún vítt og breitt við þar á meðal varðandi endurreikning lánanna. „Einnig hljótum við að krefjast þess að bankar og fjármálastofnanir einhendi sér nú af fullum krafti í að ljúka endurútreikningum og uppgjörum vegna þeirra erlendu lána sem heimilin hafa verið í óvissu með að undanförnu. Í ljósi nýjasta dóms Hæstaréttar eru allar grundvallarforsendur varðandi útreikningana komnir á borðið og því ekki eftir neinu að bíða með endurreikning lánanna - amk hvað varðar heimilin og öll smærri fyrirtæki landsins," sagði Jóhanna.

Þá sagði hún að undir forystu Samfylkingarinnar hafi þjóðinni tekist það ótrúlega - að vinna sig út úr vandanum á mettíma. „...það tókst af því allir lögðu sitt af mörkum, heimilin, atvinnulífið, sveitarfélögin, félagasamtök - allir."

„Staðan núna er sú að við höfum náð halla ríkissjóðs úr 14% af landsframleiðslu niður í um 1% og stefnt er að nær hallalausum ríkissjóði á næsta ári. Við höfum sannanlega verið að búa í haginn fyrir framtíðina og getum nú byrjað að breyta vöxtum í velferð," sagði hún.

Og í lokaorðum ræðu sinnar minntist hún á Sjálfstæðisflokkinn. „Kosningabaráttan framundan snýst um það hvort Samfylkingin verður forystuafl íslenskra stjórnmála á næsta kjörtímabili, eða Sjálfstæðisflokkurinn. Ég mun yfirgefa Stjórnarráðið hress og glöð að afloknum næstu kosningum, þegar sá sigur verður í höfn."

Ræðuna má lesa í heild sinni hér.