Já, hamingjan var hér

Tónlistarmaðurinn Jónas Sigurðsson hélt þrenna útgáfutónleika í reiðhöll Þorlákshafnar ásamt Lúðrasveit bæjarins vegna útkomu þriðju sólóplötu hans, Þar sem himin ber við haf.

Tónlistarband eldri borgara í Þorlákshöfn, Tónar og Trix, komu einnig fram og fluttu lagið Tónar við hafið sem móðir Jónasar, Ragna Erlendsdóttir, á textann að. Fullt var út úr dyrum alla þrjá tónleikadagana og komu hátt í þrettán hundruð manns að hlýða á stórkostlega tónleika.

"Tónleikarnir tókust æðislega vel. Það var eins og eitthvað hafi losnað úr læðingi því það var svo mikil samkennd og gleði í öllum sem komu á þessa tónleika. Allir sem komu að þessu stóðu sig frábærlega," segir Jónas í skýjunum.

"Þegar mest var voru hátt í sjötíu manns á sviðinu sem samanstóð af frábæru bandi, lúðrasveit í toppformi og síðan var tónlistarhópur eldri borgara sem kom, sá og sigraði. Ofan á allt vorum við með herskara af frábærum tæknimönnum sem pökkuðu þessu inn í göldróttan hljóðheim. Ég held að þetta hafi komið fólki verulega á óvart. Að keyra út á bjarg í Þorlákshöfn og ganga inn í reiðhöll sem var búið að taka algjörlega í gegn og breyta í tónleikasal með fullkomnu hljóðkerfi og ljósakerfi."

Jónas hefur slegið í gegn á Íslandi með Ritvélum framtíðarinnar og er lagið Hamingjan er hér einna vinsælast með þeirri hljómsveit. Þó Ritvélarnar, eða flestar þeirra, hafi verið víðs fjarri í Þorlákshöfn var hamingjan samt svo sannarlega mætt.

"Fyrir mig var þetta bara alveg frábær upplifun að finna fyrir samkenndinni í gamla heimabænum þar sem allir lögðust á eitt til að þetta gæti gengið. Það var sama hvað þurfti að gera eða redda, því var kippti í liðinn án nokkurra vandræða," útskýrir Jónas sem hefur í nógu að snúast þessa dagana. Hann kemur fram á nokkrum off-venue-tónleikum á Airwaves í næstu viku og síðan fyrirhugar hann túr í kringum landið um miðjan nóvember til að kynna nýju plötuna sína.