Vick fær sér hund við litla hrifningu margra

Einn umdeildasti íþróttamaður Bandaríkjanna, Michael Vick sem var dæmdur í fangelsi fyrir grimma meðferð á hundum, er orðinn hundaeigandi á nýjan leik.

Vick þurfti að dúsa í steininum í eitt og hálft ár þar sem hann ól hunda til þess að berjast ólöglega og menn á hans vegum tóku svo hundana af lífi á grimmilegan hátt. Allt átti þetta sér stað á landareign hans.

Vick, sem er leikstjórnandi Philadelphia Eagles í NFL-deildinni, hefur reynt að rétta sinn hlut eftir að hann kom úr fangelsi og hefur meðal annars unnið með dýraverndunarsamtökum og talað um illa meðferð á dýrum.

Þrátt fyrir það eru margir mjög óhressir, eða hreinlega brjálaðir, yfir því að hann sé orðinn hundaeigandi á ný en honum var hreinlega meinað að eignast hund á meðan hann var á skilorði.

"Ég skil vel að margir taki illa í það að ég sé orðinn hundaeigandi. Sem faðir finnst mér aftur á móti mikilvægt að börnin mín læri að umgangast dýr á réttan hátt. Við munum sjá mjög vel um hundinn," sagði Vick.