Fjársýslugæsin Rómeó smalar lömbum

"Gæsin stóð sig með stakri prýði og aðstoðaði okkur við innreksturinn alveg þar til síðasta lambið var komið inn í hús," segir Viðar Guðmundsson, bóndi á Miðhúsum í Kollafirði, sem fékk óvænta aðstoð við innrekstur á dögunum frá gæsinni á bænum.

Fjársýslugæsin ber nafnið Rómeó og átti hún upphaflega að vera risaeðla. Það var á vormánuðum að Matthías Schram, níu ára gamall, ákvað að hann vildi byrja að rækta risaeðlur. Kristinn Schram, pabbi hans, brá þá á það ráð að gera leik úr því að klekja út hænsnaeggi og gæsaeggi í þar til gerðu útungunartæki. "Rómeó og haninn Kafteinn ólust upp í bakgarðinum hjá okkur fyrst um sinn en þegar við fluttum suður fóru þau í fóstur á Miðhús," segir Kristinn.

Rómeó og Kafteinn búa nú í góðu yfirlæti á Miðhúsum og taka þátt í daglegu lífi þar á bæ. "Haninn er nú ekki mikið að aðstoða okkur en hann er flott selskapsdama fyrir gæsina. Hingað til hefur hann haft töluvert meiri áhuga á gæsinni en á hænunum á bænum, en hann verður bara að hafa það eins og hann vill, við erum svo líbó hérna í sveitinni," segir Viðar.

Hann segir kindurnar hafa orðið örlítið hissa á nýju viðbótinni í smalateymið en að gæsin hafi þó verið afar góð búbót þar sem hún gat flogið yfir hópinn og þannig fylgst vel með öllu. "Smalatíkin Elding aðstoðaði hana aðeins og þetta gekk afar smurt fyrir sig, enda viðlíka smalateymi vandfundið," segir Viðar.

- trs