Rekja hundaskítinn til eigandans

Ef erfðagreining yrði gerð á öllum hundum hér á landi væri tiltölulega auðvelt að hafa upp á þeim hundaeigendum sem skilja skít eftir ferfætlinga sína á víðavangi. Tvöhundruð íslenskir hundar hafa þegar verið greindir.

Matís hefur boðið upp á erfðagreiningu á dýrum en hana hafa hundaræktendur til að mynda nýtt sér til að fá staðfest ætterni hunda.

„Ástarlíf hunda virðist vera frekar flókið," segir Ragnar Jóhansson, fagstjóri hjá Matís. „Þú getur með vissum hætti sagt hver móðirin er en það geta verið tveir til þrír feður að gotinu."

Tvö hundruð hundar hafa verið erfðagreindir á síðustu þremur árum en Matís hefur nú gengið skrefinu lengra og látið magna upp erfðaefni úr hundaskít. Þessa tækni væri hægt að nota til að rekja hundaskít á víðavangi aftur til eigenda, en þá þyrfti að sjálfsögðu að erfðagreina mun fleiri hunda hér á landi.

„Það hafa verið þróuð sérstök einangrunarpróf sem hafa verið notuð í glæparannsóknum erlendis og þá væntanlega við þennan tiltekna glæp líka. Þannig er hægt að nota þessa sömu aðferðarfræði til að rekja slóðina frá skítnum til hundsins.

Erfðagreiningin sjálf kostar tæpar níuþúsund krónur en greining á hundaskít er aðeins dýrari að sögn Ragnars sem bætir við að nokkur sveitarfélög hafi viðrað þá hugmynd að greina alla hunda sína til að geta auðveldlega haft upp á þeim sem skilja hundaskít eftir á víðavangi.

„Einhverjir sveitastjórnarmenn voru að spá akkúrat í þessu atriði. Þetta er raunhæfur möguleikir að því gefnu að við fáum fersk sýni."