Segir Íslandsbanka flæktan í "fyrirlitlegan hugmyndastuld“

Jón Þorvarðarson, stærðfræðingur og rithöfundur, skrifar grein í Fréttablaðið og á Vísi í dag þar sem hann segir markaðsherferð Ergo innan Íslandsbanka stolna. Ergo sérhæfir sig í fjármögnun atvinnutækja og atvinnuhúsnæðis fyrir rekstraraðila og fjármögnun bíla og ferðavagna fyrir einstaklinga.

Auglýsingar á vegum fyrirtækisins hafa vakið nokkra athygli en það er leikarinn Valur Freyr Einarsson sem fer með aðalhlutverkið ásamt grænni brúðu. Slagorðið er „Reiknaðu með okkur" en Jón segir það vera stolið.

Í grein sinni skrifar Jón: „Birna Einarsdóttir, bankastjóri Íslandsbanka, hefur á bankaþingum lofað markaðsherferð Ergo í bak og fyrir. Verst er að hún skuli ekki á sama tíma halda þeirri skoðun á lofti að markaðsherferðin eigi rætur sínar að rekja til stolinnar hugmyndavinnu. Nefnilega hugmyndavinnu sem undirritaður lagði bankanum til fyrir nokkrum árum – hugmyndavinnu sem Birna rannsakaði ofan í kjölinn ásamt sínu nánasta samstarfsfólki."

Jón segir svo í greininni: „Þar sem um fyrirlitlegan hugmyndastuld var að ræða að mínu mati sendi ég erindi til Birnu Einarsdóttur sem og framkvæmdastjóra Ergo, Jóns Hannesar Karlssonar, og sagði mínar farir ekki sléttar.

Að undirlagi Birnu boðaði Jón Hannes mig á fund sem ég taldi að ætti að snúast um leiðréttingu á hlut bankans gagnvart mér. En það var öðru nær, því hann hafði ekki meiri manndóm í sér en að mæta til leiks vopnaður lögfræðingi bankans, sem kom mér algjörlega í opna skjöldu. Nánast frá fyrstu mínútu reyndu þeir félagarnir að verja hendur bankans með dæmafáum málatilbúnaði."

Jón segist svo hafa fengið þau svör frá vel samstilltum lögfræðingum bankans að að hugmyndavinna sín hefði fallið í djúp gleymskunnar, en markaðsdeild bankans hefði aftur á móti, í samvinnu við auglýsingastofu úti í bæ, enduruppgötvað hugmynd Jóns upp á eigin spýtur.

Að lokum skrifar Jón: „Eftir tiltölulega stutta fundarsetu með Jóni Hannesi, framkvæmdastjóra Ergo, sleit ég fundinum enda ljóst orðið hver ásetningur hans var. Auk þess var ég ekkert sérstaklega vel upplagður til að kynna mér þá yfirnáttúrulegu hæfileika sem markaðsbændur bankans búa yfir. Sem felast helst í því að þeir eru gæddir þeirri náðargáfu að „enduruppgötva" hugmyndavinnu annarra, sér í lagi ef þeir hafa verið fóðraðir á henni áður. Legg ég til að bankinn taki upp slagorðið „Enduruppgötvaðu með okkur" sem væri lýsandi táknmynd fyrir framúrskarandi færleika bankans á sviði enduruppgötvana. Þessi ráðlegging er algjörlega ókeypis af minni hálfu."

Hægt er að lesa grein Jóns í viðhengi hér fyrir neðan og auglýsingarnar má nálgast hér.