Peyton Manning er ekki dauður úr öllum æðum | Úrslit helgarinnar

Hinn 36 ára gamli Peyton Manning sýndi í nótt að lengi lifir í gömlum glæðum og að hann er langt frá því að vera búinn. Manning lék þá sinn fyrsta leik í NFL-deildinni síðan 2010 en hann missti af öllu síðasta tímabili vegna meiðsla.

Manning er þess utan kominn í nýtt lið en Indianapolis Colts sleppti honum í sumar og fór hann til Denver Broncos. Hann fékk stórt próf í nótt gegn Pittsburgh og stóð sig frábærlega í 31-19 sigri.

Manning kastaði 253 jarda og þar af voru tvær sendingar fyrir snertimarki. Hann er búinn að kasta 400 slíkar sendingar.

Fjölmiðlar vestanhafs halda vart vatni yfir þessari frammistöðu enda var engu líkara en Manning hefði aldrei farið. Broncos sannaði þess utan í nótt að liðið getur farið langt í vetur með Manning í aðalhlutverki.

Það voru nokkrir stórleikir á dagskrá í gær og San Francisco 49ers minnti á sig með flottum útisigri gegn Green Bay Packers.

Tim Tebow kastaði ekkert fyrir NY Jets en tók nokkur hlaupakerfi, stillti sér upp sem útherji og sinnti ýmsum störfum í sínum fyrsta leik fyrir félagið.

Robet Griffin III, sem var valinn annar í nýliðavalinu, sló í gegn með frábærri frammistöðu í óvæntum sigri Washington Redskins á New Orleans.

Úrslit gærdagsins:

Chicago-Indianapolis 41-21

Cleveland-Philadelphia 16-17

Detroit-St. Louis 27-23

Houston-Miami 30-10

Kansas City-Atlanta 24-40

Minnesota-Jacksonville 26-23

New Orleans-Washington 32-40

NY Jets-Buffalo 48-28

Tennessee-New England 13-34

Arizona-Seattle 20-16

Green Bay-San Francisco 22-30

Tampa Bay-Carolina 16-10

Denver-Pittsburgh 31-19

Í kvöld:

Baltimore-Cincinnati

Oakland-San Diego

Báðir leikir í beinni á ESPN America sem má finna á fjölvarpi Digital Ísland.