Mun ræða Clint Eastwood hjálpa Mitt Romney?

Stjórnmálaskýrendur í Bandaríkjunum velta því nú fyrir sér hvernig ræða leikstjórans Clint Eastwood, á flokksþingi Repúblikana á dögunum, falli í kramið hjá kjósendum.

Þekkt er að stóru stjórnmálaflokkarnir tveir, Demókrataflokkurinn og Repúblikanaflokkurinn, fái landsþekkta listamenn til að halda ræðu forsetaframbjóðendunum til stuðnings.

Yfirleit hafa ræðurnar vakið mikla lukku en sú var ekki alveg raunin eftir að stórleikarinn og leikstjórinn Clint Eastwood hélt vægast sagt furðulega stuðningsræðu fyrir Mitt Romney, forsetaframbjóðenda repúblikana, í Tampa í fyrradag.

Þegar Eastwood steig upp í pontu uppskar hann mikil fagnaðarlæti viðstaddra. Ræðan, sem átti að vera fimm mínútur að lengd, endaði í tæplega tólf mínútum. Og eyddi leikstjórinn meirihluta hennar í að tala við auðan stól, sem var hliðina á púltinu. Í stólnum lét Eastwood sem Barack Obama, bandaríkjaforseti, sæti fyrir svörum.

Fjölmiðlar vestanhafs hafa fjallað mikið um ræðuna. Sumir segja hana merki þess að Eastwood, sem er áttatíu og tveggja ára gamall, hafi tekið hliðarspor á glæsilegum ferli sem leikari og veltir blaðamaður Washington Post því fyrir sér hvort ímynd hans hafi beðið hnekki með ræðunni.

Blaðið the Palm Beach Post spyr lesendur síðu sinnar hvort að ræðan muni hjálpa Romney í kosningabaráttunni eða ræðan muni hafa neikvæð áhrif á baráttuna.

Þó ræða Eastwood sé á milli tannanna á fólki eru fjölmargir sem halda því fram að stuðningur Eastwood við Romney muni koma honum vel - enda einn virtasti leikari Bandaríkjanna.

Hvort það reynist rétt kemur í ljós í byrjun nóvember þegar kosningarnar fara fram.