Ritstjóri Ekstra Bladet segist standa einn í forinni

Poul Madsen aðalritstjóri Ekstra Bladet í Danmörku viðurkennir að blaðið hafi gert mistök í að birta upplýsingarnar um skattamál Helle Thorning Schmidt forsætisráðherra landsins.

Þetta mál hefur tröllriðið dönskum fjölmiðlum undanfarna daga en málsflutningur hefur verið í því fyrir dómstól í Söborg.

Upphaf þess er að í fyrra lak einn af spunameisturum Venstre flokksins, höfuðandstæðinga Helle í þáverandi þingkosningunum, því í Ekstra Bladet að eiginmaður hennar borgaði ekki skatta í Danmörku heldur í Sviss þar sem hann vinnur.

Sá blaðamaður sem tók við lekanum frá spunameistaranum hefur beðið forsætisráðherrann opinberlega afsökunar á skrifum sínum. Madsen sagði í heitum umræðum um málið á TV2 í gærdag að hann stæði einn í forinni eftir mistök blaðsins.

Það sem er alvarlegt í þessu máli og dómstóllinn í Söborg er í raun að fjalla um er að spunameistarinn sem hér um ræðir var aðstoðarmaður þáverandi skattamálaráðherra í stjórn Venstre.

Helle er löngu sloppin úr snörunni þar sem skatturinn hefur sagt að ekki sé hægt að véfengja að eiginmaður hennar eyði minna en 180 dögum á ári í Danmörku og eigi því rétt á að greiða skatta sína í Sviss. Skattar í Danmörku eru mun hærri en í Sviss og sparar Schmidt fjölskyldan sér því umtalsverðar fjárhæðir með þessu fyrirkomulagi.