Fjölskylda myrt í Frakklandi - Telpa komst lífs af

Fjögurra ára gömul stúlka lifði af hrottalega morðárás í Frakklandi í nótt. Stúlkan lá á grúfu milli lappa móður sinnar og hafði ekki hreyft sig í rúmar átta klukkustundir þegar lögreglumenn komu á vettvang.

Voðaverkið átti sér stað skammt frá Chevaline í frönsku Ölpunum í nótt. Lík þriggja manna, karls og tveggja kvenna, fundust í bifreiðinni en þau höfðu öll verið skotin margsinnis. Þremenningarnar voru breskir ferðamenn og eru talin tilheyra sömu fjölskyldunni.

Í fyrstu var talið að allir farþegar bílsins væru látnir enda höfðu hitamyndavélar frönsku lögreglunnar ekki greint stúlkuna þegar hún flaug yfir farartækið í nótt.

Lögreglumenn voru því steini lostnir þegar í ljós kom að telpan væri í raun á lífi og ómeidd í þokkabót. Vonast er til að stúlkan geti varpað ljósi á voðaverkið. Að sögn lögreglumannanna var stúlkan í losti og lá grafkyrr þangað til að hún dregin út úr bílnum.

Skammt frá bílnum fannst síðan önnur stúlka, átta ára að aldri, og er hún talin vera eldri systir telpunnar.. Hún hafði verið skotin þrisvar sinnum og var flutt á sjúkrahús. Hún er talin vera lífshættulega særð. Þá var hjólreiðamaður einnig skotin til bana.

Líklegt þykir að ódæðismaðurinn hafi ætlað að ræna bresku ferðamennina og ógnað þeim með einhvers konar skotvopni. Þá er talið að hjólreiðamanninn hafi borið að og að ræninginn hafi farið á taugum og skotið á fólkið.

Hvorki tangur né tetur hefur fundist af morðingjanum. Rúmlega sextíu lögreglumenn taka nú þátt rannsókninni. Þá verða líkin krufin í dag eða á morgun. Lögreglan í Frakklandi hefur enn ekki gefið út nöfn fórnarlambanna. Kennsl hafa þó verið borin á ökumann bifreiðarinnar og er hann breskur ríkisborgari.