Mourinho fór til Spánar út af Barcelona

Portúgalski þjálfarinn, Jose Mourinho, segir að ein aðalástæðan fyrir því að hann tók við Real Madrid sé sú að hann hafi viljað keppa við Barcelona.

Hann segist sífellt vera að skora á sjálfan sig og að áskorunin að etja kappi við frábært lið Barcelona hafi verið of freistandi.

"Við erum að tala um Real Madrid og Barcelona. Tvö frábær lið. Veljið hvaða annað lið sem er í heiminum og það myndi ekki ná fyrsta eða öðru sætinu í spænsku deildinni," sagði Portúgalinn kokhraustur.

"Það er nákvæmleg ástæðan fyrir því að ég fór til Madrid. Það er ekki auðvelt að keppa við Barcelona og afar erfitt að vinna deildina hérna.

"Lífið er miklu auðveldara í hinum deildunum. Allar deildir þar sem þarf ekki að berjast við Barcelona eru auðveldari. Barcelona er aðalástæðan fyrir því að ég er hér þar sem Barca setur markið mjög hátt fyrir önnur lið.

"Þeirra sigurganga er á enda en liðið er samt ekki búið að vera. Barca er enn frábært lið rétt eins og Real Madrid."