Borgarráð styrkir tónleika Of Monsters and men

Borgarráð hefur samþykkt að styrkja tónleika hljómsveitarinnar Of Monsters and Men sem haldnir verða í Hljómskálagarðinum við Tjörnina í Reykjavík 7. júlí næstkomandi.

Styrkurinn nemur 250.000 krónum og felst í undirbúningi fyrir tónleikana og þrifum eftir þá. Tónleikarnir eru haldnir í samstarfi hljómsveitarinnar Of Monsters and Men við útvarpsstöðina Bylgjuna og eru allir velkomnir.

Vísir greindi frá því í gær að hljómsveitin myndi spila í Hljómskálagarðinum í júlí en það verða fyrstu tónleikar hljómsveitarinnar hérlendis á þessu ári. Þar mun hljómsveitin flytja smelli af plötunni My head is an animal.

Meðlimir hljómsveitarinnar eru spenntir að leyfa löndum sínum loks að heyra hljómana sem ómað hafa um gervöll Bandaríkin síðustu mánuði. „Ég held þetta geti orðið ansi skemmtilegt. Hægt að gera gott kvöld úr þessu," sagði Árni Guðjónsson, hljómborðsleikari sveitarinnar í viðtali við Vísi í gær.

Tónleikarnir verða vímulaus fjölskylduskemmtun og hefjast kl. 18 að kvöldi 7. júli og lýkur kl. 22.