Eineltið mótaði Guðgeir - hataði líka lækna

Það var einelti ásamt öðrum áföllum sem mótaði persónuleika Guðgeirs Guðmundssonar, sem var dæmdur í fjórtán ára fangelsi í morgun fyrir tilraun til manndráps og hættulega líkamsárás. Guðgeir stakk framkvæmdastjóra Lagastoða, Skúla Sigurz, fimm sinnum í mars síðastliðnum og stakk svo Guðna Bergsson, samstarfsmann og lögfræðing, tvívegis í lærið þegar hann kom vinnufélaga sínum til bjargar.

Í geðheilbrigðisrannsókn sem birtist í dómi Héraðsdóms Reykjavíkur yfir Guðgeiri segir að lífsviðhorf Guðgeirs séu þannig að hann treysti ekki fólki og stendur í þeirri trú að það muni svíkja hann. Sá hugsunarháttur er afleiðing langvarandi eineltis í grunnskóla.

Þá segir að Guðgeir sé með mörg einhverfueinkenni, bæli niður reiði og „springi" þegar reiðin leitar loks út. Þá segir ennfremur í matinu að Guðgeir hafi enga ánægju af mannlegum samskiptum, hafi flatar tilfinningar og engin geðtengsl við aðra. Svo segir orðrétt í matinu:

„Ljóst sé að hann hafi enga eftirsjá varðandi glæp sinn, sem hann telji réttlætanlegan".

Eins og áður hefur komið fram hataði Guðgeir lögfræðistéttina. Meðal annars sagði hann við Guðna Bergsson, skömmu eftir að sá síðarnefndi yfirbugaði Guðgeir, að þeir hefðu átt þetta skilið. Spurður hvað hann ætti við, svaraði hann: „Þið á lögfræðistofunni."

Í dómnum kemur hinsvegar fram að lögfræðingar eru ekki eina starfsstéttin sem Guðgeiri er illa við, læknar eru einnig í þeim hópi án þess að andúð Guðgeirs á þeim sé útskýrð frekar.

Guðgeir hefur einnig öfgafullar hugmyndir um trúmál.

Í niðurstöðu geðmatsins kemur fram að Guðgeir sé talsvert mótaður af upplifunum sínum frá árum áður af miklu einelti. Heimsmynd hans er fremur neikvæð og þröng. Hann viðurkennir í raun að vissar aðstæður þar sem hann telur „svínað á sér" skapi hjá sér ofbeldishugsanir. Þannig lýsti hann því fyrir dómi að hann hefði stungið Skúla Sigurz af því hann taldi Skúla hafa glott sigri hrósandi framan í sig, og þannig gefið til kynna að honum hefði tekist á svína á Guðgeiri. Við tók hrottafengin árásin.

Í öðru mati geðlæknis kemur fram að þegar leið frá atburðinum, og Guðgeir fór að róast, hefði komið fram hjá honum að hann væri hissa yfir því að hafa misst stjórn á sér. Hann hefði hins vegar ekki dýpri merki samviskubits eða sorgar vegna þess sem hann gerði.

Í niðurstöðu Héraðsdóms Reykjavíkur kemur fram að árásin hefði verið fyrirvaralaus, ofsafengin og lífshættuleg. Guðgeir eigi sér engar málsbætur.