Gott veður og þurrt óvenju lengi

Veðrið hefur leikið við Íslendinga það sem af er sumri. Óli Þór Árnason, veðurfræðingur á Veðurstofu Íslands segir að góðviðriskaflinn hafi haldist óvenjulega lengi og úrkoman hafi verið langt undir meðallagi. „Það er búið að vera mjög einsleitt veður í júní. Það er kannski það sem er óvenjulegt í þessu," segir hann.

Nú eftir morgundaginn er útlit fyrir ákveðnari norðan- og norðaustan-átt. Því mun kólna nokkuð og þá sérstaklega á norður- og norðausturlandi. Þar má einnig gera fyrir einhverri vætu næstu daga.

Hins vegar verður fínt veður og bjart á suður- og suðvesturlandi næstu daga. Þó eflaust muni kólna lítillega getur fólk engu að síður haldið áfram að flatmaga í sólbaði á daginn á þessum landshlutum.

Spáin er nokkuð landshlutaskipt fyrir kjördag sem verður næsta laugardag. Í kortunum er svipað veður og í dag á suður- og suðvestur-landi. Hins vegar verður kaldastrekkingur og einhver væta á norður- og norðausturlandi.