Bannað að henda pappír með almennu sorpi

Hér eftir verður bannað að henda pappír, flöskum og dósum með almennu sorpi í Reykjavík. Þetta var samþykkt hjá fulltrúum meirihlutans í umhverfis- og samgönguráði borgarinnar í dag.

Breytingarnar felast í því að starfsmenn Sorphirðu Reykjavíkur munu hætta að tæma almennar ruslatunnur ef í þeim finnst pappír eða skilagjaldsskildar umbúðir. Þær verða því skildar eftir þegar ruslabíllinn fer um hverfin. Til að fylgjast með þessu munu starfsmenn borgarinnar fara um hverfin og taka út ruslatunnur fólks af handahófi. Karl Sigurðsson, formaður umhverfis- og samgönguráðs, telur rétt að kalla þessa starfsmenn leiðbeinendur en ýmsir vilja kalla þá „sorplögreglu".

„Þeir munu fara um hverfin og hjálpa fólki að flokka í tunnurnar hjá sér," segir Karl. Fólk mun ekki fá sektir þó það flokki ekki rétt en tunnurnar verða aftur á móti ekki tæmdar sé rangt flokkað í þær.

Breytingarnar sem samþykktar voru í dag munu taka gildi smátt og smátt í hverfum borgarinnar á næstu mánuðum. Fólk getur valið hvort það fær senda sérstaka bláa ruslatunnu undir pappírsúrgang, nýtir sér grenndargáma eða borgar fyrir sérstaka sorphirðuþjónustu á markaði.

Gísli Marteinn Baldursson, borgarfulltrúi Sjálfstæðisflokksins, auk Áslaugar Friðriksdóttur, lagði til að auk pappírs yrði einnig gert ráð fyrir sérstakri tunnu fyrir plastúrgang við heimili fólks. Sú tillaga hlaut ekki brautargengi. Gísli sagði í bókun að sú ákvörðun væri óskiljanleg, sorgleg og skaðleg fyrir umhverfið.

Karl segir að til þess muni koma síðar en rétt sé að taka eitt skref í einu og byrja hina auknu endurvinnslu á pappír. Karl segir lengi hafa staðið til að Reykjavík byrjaði aukna endurvinnslu og meiri ruslaflokkun. Síðustu ár hefur það verið á dagskrá en ekkert hefur gerst. „Nú ætlum við að byrja þetta og fyrsta skrefið verður pappírinn," segir Karl.