Alþjóðleg handtökuskipun á hendur Íslendingi

Alþjóðleg handtökuskipun hefur verið gefin út á hendur Íslendingi sem grunaður er um aðild að umfangsmiklu kókaínsmygli hingað til lands. Tveir aðrir hafa setið í gæsluvarðhaldi í mánuð vegna málsins.

Lögreglan verst allra frétta af málinu sem virðist vera umfangsmikið. Það hófst á því að íslenskt par á sjötugsaldri var stöðvað við komuna til landsins, við hefðbundið eftirlit í Leifsstöð. Fólkið, sem var að koma frá Danmörku reyndist vera með mikið magn af kókaíni meðferðis sem var vandlega falið í ferðatösku þeirra. Ekki hefur fengist upp gefið um hve mikið magn er að ræða en lögreglan á Suðurnesjum fer með rannsókn málsins.

Fólkinu hefur nú verið sleppt úr haldi lögreglu en sama dag og málið kom upp, þann 25. maí síðastliðinn, handtók lögreglan konu á þrítugsaldri og karlmann á fertugsaldri og eru þau grunuð um aðild að málinu. Þau hafa setið í gæsluvarðhaldi frá þeim tíma og krafðist lögregla framlengingar á varðhaldinu síðastliðinn föstudag. Sú krafa bíður nú úrskurðar Hæstaréttar.

Þessu til viðbótar Íslendingi, sem talinn er eiga aðild að málinu, nú leitað erlendis. Alþjóðleg handtökuskipun hefur verið gefin út á hendur honum. Við rannsóknina hefur einnig verið farið í nokkrar húsleitir þar sem nokkurt magn fíkniefna hefur fundist.

Á myndinni hér til hliðar er maður að nafni Steinar Aubertsson. Myndin er tekin af heimasíðu interpol. Maður þessi var settur í flokk eftirlýstra á síðunni í dag. Lögregla hefur ekki viljað staðfesta að hann tengist kókaínsmyglinu en yfirgnæfandi líkur eru á að þetta sé maðurinn sem lýst er eftir vegna málsins.