Löggan gerir status um hraðamælingar

Lögreglan hefur tekið upp á því að láta vita fyrirfram á Facebook hvar hún er við hraðamælingar.

Þeir sem eru vinir lögreglunnar á Facebook hafa tekið vísast tekið eftir því að í dag og í gær hefur hún látið vita af því að hún verði með ómerktan bíl við hraðamælingar á tilteknum stöðum í borginni.

„Við byrjuðum í því í gær að tilkynna á fésbókinni hvar hann verður þann daginn. Við teljum að með þessu séum við að auka töluvert forvarnargildi bílsins. Teljum að þetta sé gott vop í þeirri baráttu," segir Þórir Ingvarsson, rannsóknarlögreglumaður.

Um 21 þúsund manns eru í sambandi við lögregluna á Facebook en Þórir segir mikilvægt fyrir lögregluna að vera í góðum samskiptum við almenning.

„Fésbókin hefur nýst okkur mjög vel í þeim tilgangi og þetta hefur verið mjög spennandi verkefni," segir hann.

Ragnar Þór Árnason segir að bíllinn sé mest notaður við íbúagötur og í grennd við skóla og aðra staði þar sem mikið er um börn.

„Öll Vitneskja og niðurstaða frá bílnum er svo miðlað til annara lögreglumanna þegar niðurstaðan sýnir að það er of hátt brotahlutfall," segir Ragnar.

„En þetta er nú allt meðal annars gert fyrir ykkur sem eruð hérna á ferðinni. Vernda ykkur eins vel og við getum er það ekki?"