Mekka íslenska hestsins er á Íslandi

Sigurbjörn Bárðarson segir mikilvægt að selja graðhesta úr landi. Í viðtali í útvarpsþættinum Reykjavík síðdegis í dag var hann spurður hvort hestamenn væru að skjóta sig í fótinn með því að selja graðhesta úr landi og hvort hestaræktin myndi þá ekki færast alfarið til útlanda.

„Við verðum að selja það besta svo kúnninn vilji versla við okkur," sagði Sigurbjörn og sagði að menn yrðu þá bara að standa sig enn betur hér á landi að rækta góða hesta.

Áður var talað um að ekki mætti selja graðhesta úr landi af því þar með væru Íslendingar að selja mjólkurkúna.

„Það vita allir að mekka íslenska hestsins er á Íslandi og hingað leita þeir alltaf eftir ferska blóðinu," sagði hann um útlendinga.

Sigurbjörn er einn mesti hestaíþróttaafreksmaður Íslendinga.